~*Tonight Dinner*~

今個星期成個禮拜都OT, 都冇時間煮過飯，weekend有時間2個都起屋企,就煮返餐豐富d,對自己同老公仔都好d. 😊

今晚2個人煮左4個餸:

1.蒜蓉粉絲蒸花曱

2. 三文魚豆腐煲

3. 洋蔥豬扒

4. 蒜蓉炒油墨菜

個花甲今次咁樣整好食好多，上次諗住用豉汁炒，點知隻鑊唔夠鑊氣??d花曱不停出水，仲愈煮愈喊!!😰

成日好想買多個LC buffet，試下做冇水蒸, 點知有人話廚房冇咁多位啦!!唔俾我買!!哼!!😤

不過我就突然醒起之前起Sogo thankful week買左個塔吉鍋都未開光，就試下做唔做到冇水蒸先. 哈哈，都算好成功，係加多左少少水，下次要再好好控制下水既分量!!!😉 

又可以慳返一筆啦，不過LC buffet都會繼續起我既 to buy list既!!haha ~~~~~😝

食譜:

蒜泥粉絲蒸花甲

1. 花甲洗淨吐沙，粉絲浸軟備用

2. 蒜頭一個切碎分成2份

3. 燒熱油將一粉蒜蓉炸成熟蒜至金黃色內，攤涼備用

4. 粉絲鋪於碟底，加上少許雞湯，再放上花甲及生熟蒜

5. 大火蒸5-6分鐘，再灑上蔥花及小許滾油即可

三文魚豆腐煲

1. 豆腐切件，灑上少許鹽，可抽出水份

2. 三文魚切件用鹽及胡椒粉調味

3. 豆腐及三文魚先點上雞蛋，及薄薄一層面粉，再炸至金黃色

4. 燒熱少許油於煲內，炒香薑片及蔥段，加入3.之三文魚及豆腐，再加入調味汁料 (水，糖，蠔油，老抽生抽，生粉)煮沸，熄火加蓋焗5分鐘即成

洋蔥豬扒

1. 豬扒用刀背刴鬆，以生抽，老抽，糖，麻油，豆粉調味

2. 洋蔥切絲

3. 燒熱油，洋蔥略炒至軟身，剩起備用

4. 豬扒煎香2面至8成熟，加入洋蔥，蠔油，加蓋焗10分鐘至熟及入味，即成!!

~*柱候炆枝竹牛白腩*~

老公仔最近都要OT, 冇時間返黎食飯,唔想佢一日三餐都食街外野，

唯有預備pack lunch俾佢,食少d街外食物,健康d嗎!!!

個日行過超市見到pack牛腩幾靚,醒起雪櫃又仲有半樽柱侯醬,一於炆牛白腩。😊

傳次食牛白腩,蘿蔔枝竹先係主角，今次加左一大條白蘿蔔，一大包枝竹，炆埋有一大煲。😅

食左3日先食得曬!!😛

~*牛油果雞肉三文治配焗薯*~

我好鍾意食牛油果,不過香港好少食到好食既牛油果,仲要賣得唔平wor!!

早2日行過Jason見到牛油果做緊特價,一袋5，6個都係$20!!

見d牛油果放左幾日已經熟曬,要諗放法食左佢!!

岩曬,呢幾日食得heavy左,今晚一於食返light少少,就整個"牛油果雞肉三文治"。只係三文治又怕唔夠飽,一於配埋個焗薯就岩岩好啦!!☺

~*鮮蝦菜肉雲吞*~

連續3日假期,老公仔今日又有約,難得起屋企就整d麻煩少少既野食啦!!

自家制鮮蝦菜肉雲吞，自己包雲吞又冇味精,自己鍾意用咩料都得。今次都係跟返自細媽咪包開既方法同材料。用左西洋菜,鍾意佢淥完唔會太淋,仲有特別別既香味

食譜:

蝦......適量

豬肉......我買左$20

西洋菜......半斤

東菰.......數隻

白色圓型雲吞皮

(以上大約包到30隻)

1. 豬肉刴成免治肉

2. 西洋菜用滾水湯熟, 隔水攤凍代涼後切碎。

3. 東菰切碎代用

4. 蝦去殼及蝦腸,如太大隻可切半,以少許胡椒粉調味。

5. 將免治豬肉,東菰及西洋菜混合，以麻油,糖，生抽，生粉調味。

6. 將豬肉及蝦用雲吞皮包好即成。

包完即刻忍唔淥左幾隻黎成。😛

~*Zucchini*~

放工返屋企又想食住家飯，碟頭飯就又快又好味!!

Zucchini中文叫翠玉瓜/夏南瓜。鍾意佢軟綿綿甜甜既口感,用黎炒又得，BBQ又得,以前起澳洲就會用西式煮法，跟home stay既意大利人加雞蛋面粉炸,外脆內軟，yummy ~~~~~~ 😛

講返今晚既晚餐, 翠玉瓜炒肉片，見雪櫃仲有d用剩既雲耳,加埋落去........我好鍾意食雲耳。😉

食譜:

翠玉瓜 一條

豬肉 適量 (可用雞肉/牛肉代替)

雲耳 隨意

1.翠玉瓜，豬肉切片。豬肉用生抽,麻油,頭粉調味。

2.雲耳浸軟身。

3.燒熱油，炒香豬肉片，盛起備用。

4. 翠玉瓜略炒致軟身，下豬肉片及雲耳致熟透。

~*Good Morning*~

Good Morning ~ 😄久違既好天氣! 咁好天氣,唔想懶洋洋咁, 早d起身落街買返個好味早餐。

外賣早餐都要擺得靚靚先食得開心嗎!!❤

~*House Warming*~

大成功!!!

講左幾個月既house warming party終於起熱熱鬧鬧既氣氛下完成。

第一預備15人既晚餐,真係一個大挑戰呀!!!平日只9係煮下2個人飯仔。所以一個月前已經開始plan定呢日既menu。平日買買埋埋一大堆食譜,終於有佢既用處啦!!😀由食譜到點樣serving都plan左好耐。

最後定左以下menu:

1.日式溫泉蛋麻醬沙律

2. 芥末涼拌雲耳青瓜

3. 金菰牛肉卷

4. 芝士焗肉醬意粉

5. 咖哩雞

6. 口水手撕雞

7. 爉味煲仔飯

其實煮呢餐個人我大傷風,當日食藥食到咩味覺都冇曬, 完全試唔到味,有幾味我仲係第一次整,好好彩大家都讚好味,真係好開心。😄

~*日式咖哩飯*~

放工返黎,又唔想街食,煮日式咖哩飯就最快手.

包咖哩係之前起759買既,其實一開加熱就食得,不過返左成日工,就緊係食好少少啦!!😜

於是加左雞肉,薯仔同埋紅蘿蔔,咁就有菜又有肉啦!!

洗洗切切連煮都係20分鐘, 真係仲快過煮個白飯呀。

有咩幸福過放工唔駛同人迫, 又有住家飯食呢??💕💕

食譜:

1. 雞扒/雞胸切成一口大少,用生抽,糖,麻油調味。

2. 甘筍及薯仔切粒

3. 燒熱油鑊, 將雞肉略煎7成熟或2邊微焦。

4. 盛起雞肉備用, 將甘筍及薯仔粒略炒一下。

5. 將雞肉，甘筍及薯仔粒連同日式咖哩汁加熱至蔬菜變軟。

6. 盛起伴以白飯享用。

~*生炒糯米飯*~

Yeah ~ 第一次整生炒糯米飯就好成功,炒到粒粒分明,一d都冇痴底。😁

炒之前上網睇左唔同既reference,有d會先蒸後炒,有d就先浸水後炒,概然係叫得生炒糯米飯,咁就緊係由生米開始炒起啦!😀加上覺得先將d米蒸熟再炒,落鑊後好似會好難推開。今次跟左LC class既方法去炒,一邊炒,一邊加水,方法跟粉risotto類同。不過都足足炒左20mins,第二日隻右手仲酸酸痛!😣

做法:
1.先將糯米浸2小時。

2.東菰，干搖柱及蝦米預先浸軟身,東菰切絲再用生抽,糖,麻油調味。

3.臘腸,潤腸及臘肉用熱水拖水數10秒,再切粒備用。

4.燒熱油鑊,將以上配料炒香。

5.糯米滴乾水,加入鑊中炒伴,於米中弄一個井型,逐水加入雞湯,再炒直到雞湯被吸收。不斷重複以上步驟,直至飯炒到合適軟硬度。

6.加入老抽上色即成。